የአማራ ባንክ ዋና ሥራ አስፈጻሚ በመሆን ሲያገለግሉ የቆዩት ዮሐንስ አያሌው (ዶ/ር)፣ በቅርቡ የፕሬዝዳንት ለውጥ ባደረገው ፀደይ ባንክ ውስጥ አቶ መኮንን የለውምወሰንን ተክተው ለመሥራት ከስምምነት ላይ መድረሳቸው ካፒታል ጋዜጣ ከምንጮቹ ተሰምቷል።
ዮሐንስ ቀደም ሲል በኢትዮጵያ ብሔራዊ ባንክ ምክትል ገዥነትና ዋና ኢኮኖሚስት እንዲሁም ደግሞ በኢትዮጵያ ልማት ባንክ ፕሬዝዳንትነት ያካበቱትን ሰፊ ልምድ ይዘው ከመስከረም 3 ቀን 2017 ዓ.ም ጀምሮ የአማራ ባንክን ሲመሩ የቆዩ ቢሆንም፣ አሁን ግን ወደ ፀደይ ባንክ ለመዘዋወር መወሰናቸው ታውቋል።
ይህንን ተከትሎም አማራ ባንክ ባዶ የሆነውን የዋና ሥራ አስፈጻሚ ቦታ ለመሙላት ብቁ የሆኑ አመራሮችን ለማግኘት ፍለጋ ላይ መሆኑን የውስጥ የካፒታል ምንጮች ጠቁመዋል።
የቀድሞው አማራ ብድርና ቁጠባ ተቋም ወደ ባንክነት በመሸጋገር ፀደይ ባንክ ተብሎ ከተሰየመ በኋላ፣ ባንኩን በፕሬዝዳንትነት ሲመሩ የቆዩት አቶ መኮንን የለውምወሰን በምን ምክንያት ኃላፊነታቸውን እንደለቀቁ በይፋ አልተገለጸም።
አቶ መኮንን ስራቸውን መልቀቃቸውን ተከትሎ፣ በአማራ ክልል ምክትል ፕሬዝዳንት ዶ/ር ደረሰ ኃይሉ የሚመራው የባንኩ የዳይሬክተሮች ቦርድ ወ/ሮ የሺእመቤት ተፈራን በተጠባባቂ ፕሬዝዳንትነት መመደቡ ይታወሳል። ይሁን እንጂ ባንኩ አሁን ካለበት ከባድ የፋይናንስ ሁኔታ አንጻር ዶ/ር ዮሐንስን በቋሚነት ለመሾም ስምምነት ላይ መደረሱ ተመልክቷል።
ፀደይ ባንክ በቅርቡ ይፋ ባደረገው የ2017 የሒሳብ ዓመት የሥራ አፈጻጸም ሪፖርት መሠረት፣ 2.13 ቢሊዮን ብር የሚጠጋ ከፍተኛ ኪሳራ ማጋጠሙን አስታውቋል።
ይህ ከፍተኛ የፋይናንስ ክፍተት ባጋጠመበት ወቅት ዶ/ር ዮሐንስ ወደ አመራርነት መምጣታቸው፣ ባንኩን ከኪሳራ ለማውጣትና ወደ ትርፋማነት ለመመለስ ካለው ከፍተኛ ተስፋ የመነጨ እንደሆነ ይገመታል።
