አይኤምኤፍ ለኢትዮጵያ ተጨማሪ 261 ሚሊዮን ዶላር እንዲለቀቅ ወሰነ

የዓለም አቀፍ የገንዘብ ድርጅት (አይኤምኤፍ) የሥራ አስፈፃሚ ቦርድ በኢትዮጵያ እየተተገበረ ባለው የተራዘመ የብድር አቅርቦት ፕሮግራም ላይ አራተኛውን ግምገማ በማጠናቀቁ፤ አገሪቱ የ261 ሚሊዮን ዶላር ተጨማሪ ብድር እንድታገኝ መወሰኑን አስታወቀ።

ይህ ውሳኔ ኢትዮጵያ በፕሮግራሙ ሥር እስካሁን ያገኘችውን ጠቅላላ የገንዘብ መጠን ወደ 2.183 ቢሊዮን ዶላር ከፍ ያደረገው ሲሆን፣ ገንዘቡ አገሪቱ የውጭ ክፍያ ሚዛንና የበጀት ፍላጎቶቿን እንድታሟላ ይረዳታል።

የድርጅቱ ምክትል ማኔጂንግ ዳይሬክተር ናይጄል ክላርክ እንደገለጹት፣ የኢትዮጵያ መንግሥት በሀገር በቀል የኢኮኖሚ ማሻሻያ አጀንዳው መሠረት እያከናወናቸው ያሉት ማሻሻያዎች ከሚጠበቀው በላይ ውጤት እያሳዩ ይገኛሉ።

በተለይም የውጭ ምንዛሬ ገበያውን ለማዘመን የተወሰዱ እርምጃዎች፣ የኤክስፖርት ዕድገት፣ የታክስ ገቢ አሰባሰብ መሻሻል እና የዋጋ ግሽበት መቀነስ ለኢኮኖሚው መረጋጋት ተስፋ ሰጪ ውጤቶች መሆናቸውን ቦርዱ አረጋግጧል። ይሁን እንጂ ዘላቂ የኢኮኖሚ ዕድገት ለማምጣትና ድህነትን ለመቀነስ የማሻሻያ ሥራዎቹ በተመሳሳይ ፍጥነት መቀጠል እንዳለባቸው አሳስቧል።

ቦርዱ በውይይቱ ወቅት የኢትዮጵያ ብሔራዊ ባንክ የውጭ ምንዛሬ ገበያውን ይበልጥ ግልጽ ለማድረግና የባንኮችን የተጣራ የውጭ ምንዛሬ ክምችት ወደ ሕጋዊ ገደብ ለማምጣት እያደረገ ያለውን ጥረት አድንቋል።

ከዚሁ ጋር ተያይዞ ብሔራዊ ባንክ ከጨረታ ውጭ በውጭ ምንዛሬ ገበያው ውስጥ ጣልቃ እንዳይገባ የሚከለክል አዲስ መመሪያ መካተቱ ተገልጿል።

የኢትዮጵያ መንግሥት የበጀት ጉድለቱን ለመቆጣጠር፣ የታክስ መሠረቱን ለማስፋት እና የነዳጅ ድጎማን በሂደት ለማንሳት የገባውን ቃል ተግባራዊ ማድረጉ የበጀት ጥንካሬን ለመመለስ ወሳኝ መሆኑም በመግለጫው ተመልክቷል።

በመጨረሻም፣ ኢትዮጵያ ከብድር አበዳሪ አገራት (OCC) ጋር የደረሰችው የመግባቢያ ስምምነት አበረታች መሆኑን የጠቀሰው አይ ኤም ኤፍ፣ ከግል አበዳሪዎች ጋር የሚደረገው ድርድር ተጠናክሮ እንዲቀጥል መክሯል።

አገሪቱ አዳዲስ የንግድ ብድሮችን ከመውሰድ በመቆጠብና ቅድሚያ ለልማት ፕሮጀክቶች ትኩረት በመስጠት የብድር ጫናዋን እንድታቃልልም ድርጅቱ ጥሪ አቅርቧል።